MmsBee कोई तो रोक लो

[desiaks]

{Update - 225}
____________________________

Raj ka kamra aate hi nikki hume raj ka kamra dikhne andar bulane lagi. Mujhe kuch samajh nahi aaya ki nikki achanak hume raj ka kamra kyo dikhane lagi. Magar maine kuch nahi kaha aur chup chap sabke sath raj ke kamre me aa gaya.

Raj ke kamre me pahuchte hi, hum sab ki najar uske kamre me saje medal aur trophy par padi. Itne saare medal aur trophy dekhte hi, ami ne chaukte huye nikki se puchha.

Ami boli “didi ye itni saari trophy aur medal kya raj bhaiya ne jeete hai.”

Ami ki baat par nikki ne muskurate huye kaha.

Nikki boli “nahi, ye sab medal aur trophy priya ne jeete hai. Priya swimming champion hai. Lekin apni bimari ki vajah se ab wo kisi tournament me hissa nahi leti hai.”

Nikki ki baat sunkar, ami bade gaur se priya ke jeete huye medal aur trophy ko dekhne lagi. Ab mujhe samajh me aa raha tha ki, nikki hum sab logon ko raj ke kamre me kyo lekar aayi thi.

Asal me ami nimi dono ko swimming bahut pasand thi. Shayad isi vajah se nikki ne unhe priya ke jeete huye medal aur trophy dikhaye the. Jis se ami nimi ko priya ke karib laya ja sake. Thodi der sab raj ke kamre me priya ke medal aur trophy dekhte rahe. Fir priya ko dekhne uske kamre ki taraf chal pade.

Jab hum priya ke kamre me pahuche to, priya bed par leti Tv dekh rahi thi. Usne hume aate dekha to, fauran Tv band kar di aur uth kar baith gayi. Hum sabko ek sath aaya dekh kar, uske chehre par muskurahat aa gayi.

Priya ki tabiyat ab pahle se behtar thi. Bas wo thodi kamjor najar aa rahi thi. Us samay mujhe us par bahut pyar aa raha tha. Isliye maine uske pas jakar baithte huye kaha.

Mai bola “tum yaha aaram se baith kar Tv dekh rahi ho aur hum log kab se niche baithe tumhare niche aane ka intejar kar the.”

Meri is baat par priya ne apne tevar badalte huye kaha.

Priya boli “oye jyada jhuth mat bolo. Mai abhi thodi der pahle hi niche se upar aayi hu. Sidhe se kyu nahi kahte ki, tum logon ko mumbai ghumne se ab fursat mili hai.”

Priya ki is baat me sachchai thi. Lekin wo ye baat majak me kah rahi thi. Isliye maine bhi usi ke lahje me us se kaha.

Mai bola “mai jhuth nahi bol raha hu. Tum chaho nikki se puchh lo. Hum log kitni der se niche baithe hai.”

Priya boli “mujhe kisi se kuch nahi puchhna hai. Tum ami nimi ko mumbai ghuma rahe the. Isliye mai tumse koi jhagda nahi karugi.”

Priya ki is baat par maine hanste huye kaha.

Mai bola “chalo kisi bhi bahane sahi, tumhari sikayat to door huyi. Ab ye batao ki nidhi didi ne tumhe kitne din ghar par aaram karne ko kaha hai.”

Meri baat sunkar priya ne thoda udas hote huye kaha.

Priya boli “nidhi didi ne to mujhe pure ek hafte aaram karne ko kaha hai. Lekin tum log to yaha sirf 2 din ke liye ho. Tum logon ko kab wapas jana hai.”

Mai priya ki haalat ko samajh raha tha. Wo mere jaane ki baat ko lekar udas thi. Isliye mahol ko kuch halka karne ki niyat se maine muskurate huye kaha.

Mai bola “hum logon ko kal wapas jana hai. Lekin humhare jane ki baat se tum udas mat ho. Tum jab chahogi, mai tumse milne chala aauga.”

Meri is baat se priya ke chehre par thodi si muskan aa gayi. Usne abhi tak mere alawa kisi se baat nahi ki thi. Lekin jaise hi uski najar ami nimi par padi to, usne muskurate huye ami nimi se kaha.

Priya boli “tum logon ne mumbai ache se ghooma ya nahi.”

Priya ki is baat par ami to kuch nahi boli. Lekin nimi ne uski baat ka jabab dete huye kaha.

Nimi boli “didi humne puri mumbai ghoom li hai aur mumbai ghoom kar hume bahut maja aaya.”

Nimi ki is baat ke jabab me priya ne kaha.

Priya boli “meri tabiyat kharab nahi hoti to, mai khud hi tum logon ko mumbai ghumane lekar chalti. Lekin chinta mat karo, agli baar jab tum log aaogi, tab mai khud tumhe mumbai ghumaugi. Tab dekhna tumhe aur bhi jyada maja aayega.”

Priya ki ye baat sunkar nimi use, humne kaha kaha ghooma batane lagi. Kuch der tak priya aur nimi ki ye hi baten chalti rahi. Fir bad me keerti aur barkha didi ki us se thodi bahut baten huyi.

Humne samay dekha to, ab 7:30 baj raha tha. Hum subah ke nikle huye the aur ghumne firne ki vajah se ab hume thakan bhi mehsus hone lagi thi. Isliye humne priya se jaane ki ijajat li aur hum priya ke sath niche aa gaye.

Niche aakar humne padmini aunty aur dada ji se jaane ki ijajat maangi. Magar padmini aunty khana kha kar jaane ki jid karne lagi. Hum subah ke nikle the aur humne dopahar ka khana bhi bahar khaya tha.

Dopahar ka khana bahar khane ka to humne shikha didi ko bata diya tha. Lekin sham ka khana un ne sath khane ka jataya tha. Isliye hum waha khana khana nahi chahte the.

Magar padmini aunty ne bhi khana kha kar hi jaane ki jid bandh li thi. Jis vajah se humne shikha didi ko call karke priya ke ghar khana khane ki baat batayi. Shikha didi ne is baat ka koi virodh nahi kiya aur subah ka khana sath khane ki baat kah kar hume waha khana khane ki ijajat de di.

Humare khane ki baat tay hote hi, padmini aunty kitchen me chali gayi. Unke jaane ke bad, humari dada ji aur mohini aunty se baat hone lagi. Mohini aunty pahle se bahut jyada badal chuki thi.

Fir bhi unki pahle ki priya ko kahi kuch baten mujhe abhi bhi chubh rahi thi. Jis vajah se meri unse jyada baten nahi ho saki. Kuch der bad raj aur uncle bhi aa gaye. Unse bhi humari thodi bahut baten huyi.

Fir padmini aunty ne khana laga diya to hum sab sath me khana khane lage. Khana khane ke bad fir se hum logon ki baton ka silsila chalta raha. Fir 10 baje hum log dada ji aur baki logon se ijajat lekar ajay ke bungalow jaane ke liye nikal pade.

Sab thake huye the, isliye ghar aate hi sab sone ke liye apne apne kamre me chale gaye. Maine apne kamre me aakar kapde badle aur keerti ke aane ka intejar karne laga.

Raat ko 11 baje keerti aayi. Us se meri roj ki tarah hi baten huyi aur fir 1 baje wo apne kamre me chali gayi. Keerti ke jaane ke bad, mai kal ghar wapas jaane ke baare me sochne laga.

Mai kuch din priya ke sath rahna chahta tha. Lekin ami nimi ke sath hone ki vajah se abhi mera yaha rukna sahi nahi tha. Yahi sab baten sochte sochte pata nahi kab meri nind lag gayi.

Subah meri nind 8:30 baje nimi ke jagane par khuli. Maine us se baki sab ka puchha to, usne bataya ki sab uth kar taoyar ho chuke hai. Bas mai hi uthne ke liye baki tha aur usne mujhe bhi jaga diya hai.

Iske bad mai uth kar fresh hone chala gaya. Nahane ke bad mai taiyar hone laga, tabhi keerti chay lekar aa gayi. Maine chay peete huye keerti se kaha.

Mai bola “humari flight sham ko 5 baje ki hai. Tum apna aur ami nimi ka saman pack kar lo. Kyoki din bhar sabse milne julne me hume packing ka samay nahi mil payega.”

Keerti boli “tum iski fikar mat karo, dopahar ko shikha didi ke pas khane par jaane se pahle mai apni aur ami nimi ki saari packing kar lugi.”

Abhi meri keerti se baat chal hi rahi thi ki, tabhi barkha didi aur ami nimi bhi mere kamre me aa gayi. Barkha didi ne mujhse ghumne chalne ke baare me puchha to maine kahi bhi jaane se mana kar diya.

Lekin ami nimi ka mumbai ghumne se man nahi bhara tha. Wo dono kahi chalne ki jid karne lagi. Maine unhe samjhaya ki, aaj hume ghar wapas jana hai aur ghumne ke chakkar me hum yaha kisi se mil nahi sakege.

Meri is baat ke jabab me barkha didi ne ami nimi se kaha ki, wo unke sath ghumne chale aur mujhe yaha sabse milne ke liye chhod dete hai. Ami nimi ko unki ye baat sahi lagi.

Lekin wo keerti se bhi sath chalne ki jid karne lagi. Keerti ka man ghumne jaane ka nahi tha. Lekin ami nimi ki jid ke aage use jhukna hi pada. Kuch hi der me ami nimi, keerti aur barkha didi ghumne chali gayi aur mai hetal didi se milne hospital chala gaya.

Maine hetal didi ko aaj apne jaane ki baat batayi to, wo mujhe kuch din rukne ki baat kahne lagi. Lekin maine unhe kisi tarah se samjha diya. Mai dopahar ko 12 baje tak hetal didi ke pas raha. Fir shikha didi ka khane ke liye call aaya to, mai wahi se aman ke ghar ke liye nikal gaya.

Mere waha pahuchne se pahle hi ami nimi, keerti aur barkha didi waha pahuch chuki thi. Hum sabne ek sath khana khaya aur iske bad humari yaha waha ki baten hoti rahi. Fir 2 baje mai waha se priya ke ghar aa gaya.

Priya mujhe niche hi mil gayi. Shayad use kisi se pata chal gaya tha ki, mai waha aa raha hu. Mai jab waha pahucha to, waha padmini aunty, mohini aunty, nitika, riya, nikki aur priya baithi Tv dekh rahi thi.

Maine un logon se dada ji aur raj ka puchha to, un ne bataya ki wo dono apne kamre me hai. Isliye pahle mai dada ji se jakar mila. Un ne mujhe aate rahne ko kaha aur priya ki taraf se befikar rahne ko kaha. Unse milne ke bad, mai raj ke kamre me gaya. Raj ne bhi mujhse wahi baat boli, jo dada ji ne boli thi.

Iske bad meri raj se yaha wahan ki baten hoti rahi. Baton baton me maine raj se hitu (hitesh) ke baare me puchha to, usne bataya ki hitu abhi apne mama ke ghar gaya hua hai. Use priya ki tabiyat ke baare me kuch pata nahi hai.

Raj se thodi bahut baat karne ke bad, mai uske sath niche aa gaya. Mai niche aaya to, priya bhi mere sath chalne ki jid karne lagi. Maine use sath chalne se mana kiya to, wo muh fula kar baith gayi.

Uska foola hua muh dekh kar padmini aunty ne use sath le jane ko kaha. Iske bad mai thodi der wha ruka aur fir 3:30 baje waha se ajay ke bungalow ke liye nikal liya. Mere sath raj, riya, nitika, nikki aur priya bhi the.

Kuch hi der me hum log ghar pahuch gaye. Waha keerti aur ami nimi pahle hi aa chuke the. Humne apna saman liya aur fir airport ke liye nikal pade. Kuch hi der me hum airport pahuch gaye.

Waha par ajay aur shikha didi pahle se hi the. Abhi 4:15 baja tha aur humari flight chhutne me abhi 45 min ka samay baki tha. Mai ek ek karke sabse mil raha tha. Shikha didi ne ami nimi ko dher saare gift diye the aur mujhe apna khayal rakhne ke liye samjha rahi thi.

Ajay aur shikha didi se milne ke bad, mai raj logon se mila. Raj ne mujhe aate rahne ka jataya aur fir gale lag kar vidayi di. Raj ke bad, riya nikki ne bhi hath mila kar mujhe vidayi di.

Nisha bhabhi aur seeru didi logon se mai ghar par hi mil chuka tha aur maine hi unhe airport aane se mana kiya tha. Isliye wo log nahi aayi thi. Barkha didi ne mujhe gale laga kar, vidayi di.

Fir sabse aakhiri me mai priya se mila. Us se maine apni tabiyat ka khayal rakhne ko kaha aur tabiyat thik hote hi humare ghar aane ka jataya. Priya ne mujhe pichhli baat yaad dilate huye kaha.

Priya boli “tumhe yaad hai. Pichhli baar jab tum ja rahe the to, tumko lag raha tha ki, tum kuch bhool gaye ho. Lekin maine jab ghar jakar dekha to, mujhe waha kuch nahi mila tha. Kya tumhe yaad aaya ki, pichhli baar tum kya bhool gaye the.”

Priya ki is baat par maine muskurate huye kaha.

Mai bola “haan, mujhe yaad aa gaya tha ki, mai kya bhool gaya tha.”

Priya boli “kya.”

Mai bola “mai tum jaisi pyari dost ko yahi chhod kar ja raha tha. Isliye mujhe lag raha tha ki, mai kuch bhool gaya hu.”

Meri baat sunkar priya ke chehre par bhi muskurahat aa gayi aur usne pichhli baar ki tarah is baar bhi mujhe muskurate huye vidayi di. Kuch hi der me humari flight ki ghoshna ho gayi.

Mai ajay se gale mila aur ek baar sabki taraf dekh kar haath hilaya. Fir mai keerti aur ami nimi ke sath me flight ki taraf bad gaya. Is baar mumbai se jaate samay meri aankhon me nami nahi thi.

Lekin fir bhi mujhe aisa lag raha tha ki, mai bahut kuch apna yaha chhod kar ja raha hu. Yahi sab sochte huye mai apni flight par pahuch gaya. Ami nimi ghar wapsi se khush nazar aa rahi thi.

Magar mai kuch udas sa tha aur ye udasi priya ko yaha chhod kar jaane ki thi. Mai apni isi udasi ke sath flight par chadh gaya aur kuch hi der bad humari flight ne udan bharna suru kar diya.