MmsBee कोई तो रोक लो

[desiaks]

{Update - 226}
____________________________

Priya boli “tumhe yaad hai. Pichhli baar jab tum ja rahe the to, tumko lag raha tha ki, tum kuch bhool gaye ho. Lekin maine jab ghar jakar dekha to, mujhe waha kuch nahi mila tha. Kya tumhe yaad aaya ki, pichhli baar tum kya bhool gaye the.”

Priya ki is baat par maine muskurate huye kaha.

Mai bola “haan, mujhe yaad aa gaya tha ki, mai kya bhool gaya tha.”

Priya boli “kya.”

Mai bola “mai tum jaisi pyari dost ko yahi chhod kar ja raha tha. Isliye mujhe lag raha tha ki, mai kuch bhool gaya hu.”

Meri baat sunkar priya ke chehre par bhi muskurahat aa gayi aur usne pichhli baar ki tarah is baar bhi mujhe muskurate huye vidayi di. Kuch hi der me humari flight ki ghoshna ho gayi.

Mai ajay se gale mila aur ek baar sabki taraf dekh kar hath hilaya. Fir mai keerti aur ami nimi ke sath me flight ki taraf bad gaya. Is baar mumbai se jate samay meri aankhon me nami nahi thi.

Lekin fir bhi mujhe aisa lag raha tha ki, mai bahut kuch apna yaha chhod kar ja raha hu. Yahi sab sochte huye mai apni flight par pahuch gaya. Ami nimi ghar wapsi se khush nazar aa rahi thi.

Magar mai kuch udas sa tha aur ye udasi priya ko yaha chhod kar jaane ki thi. Mai apni isi udasi ke sath flight par chadh gaya aur kuch hi der bad humari flight ne udan bharna suru kar diya.

Lekin meri udasi kam hone ka naam hi nahi le rahi thi. Pichhli baar jab mai yaha se apne ghar wapas ja raha tha. Tab mujhe priya ko akela chhod jaane ka dukh sata raha tha aur mai behatasha ro raha tha.

Magar is baar mai apni ek bahan ko akela chhod kar jaane aur dusri bahan ki uske liye beshumar nafrat ko lekar dukhi tha. Mai chah kar bhi is sab se nikalne ka koi rasta nahi nikal paya tha.

Mai apni is bebasi par aansu to nahi baha pa raha tha. Lekin udas jarur ho gaya tha. Mujhe samajh me nahi aa raha tha ki, aage aane wale samay me priya ke sath kya hone wala hai.

Bahut jaldi hi neha ki apne ghar wapsi hona thi. Uske bad neha ka priya ke sath kaisa bartav rahta hai. Is baat ne bhi mujhe soch me daal diya tha. Dusri taraf ami thi ki, priya ke baare me kuch sunna hi pasand nahi kar rahi thi.

Pichhle 12 din me ami ne priya ko lekar apna jo roop dikhaya tha. Usne bhi mujhe dara kar rakh diya tha. Mai to ami se ye tak kahne ki himmat nahi juta pa raha tha ki, priya humari bahan hai.

Aise me mujhe samajh me nahi aa raha tha ki, ami ke man me priya ke liye jo nafrat hai, use kaise bahar nikalu. Use kaise samjhau ki, priya uski badi bahan hai aur priya ko kabhi na kabhi humare pas aana hai.

Chhoti maa ne hum teeno bhai bahan ke bich kabhi sage sautele ki diwar ko nahi aane diya tha. Lekin ami thi ki, priya ko lekar apne man me na jaane kaun sa vaham paali huyi thi, use jara bhi pasand nahi kar rahi thi.

Ami ki is harkat ki vajah se chhoti maa bhi pareshan thi aur ab to unhe richa aunty se bhi ami ke Mumbai jaane ke pahle ki harkat ka pata chal gaya hoga. Is baat ne bhi mujhe pareshan kar diya tha.

Mai nahi chahta tha ki, koi bhi ami ke sath kisi tarah ki jabardasti kare. Bhale hi priya meri judwa bahan thi. Lekin is baat se inkar nahi kiya ja sakta tha ki, ami nimi me meri jaan basti hai.

Mai ami nimi ko kisi bhi tarah se dukhi hote nahi dekh sakta tha. Mujhe jald se jald ami ke man se priya ke liye nafrat ko nikalna tha. Lekin kaise ye baat mujhe samajh me nahi aa rahi thi.

Mai apne man me aise hi hajaron sawalon me uljha hua tha aur 8 baje humare flight ne udan bharna band kar diya aur humara shahar aa gaya. Mai ami nimi aur keerti ke sath flight se utar kar bahar aa gaya.

Mujhe laga tha ki, hume airport par lene ke liye chhoti maa ya vaani didi me koi aaya hoga. Lekin hume lene ke liye mehul aaya tha. Usne mujhe dekhte hi apne gale se lagate huye kaha.

Mehul bola “kaisa hai tu, priya kaisi hai.”

Mai bola “mai acha hu aur priya ki tabiyat bhi ab thik hai. Lekin chhoti maa kaha hai. Wo hume lene kyo nahi aayi.”

Mehul bola “aunty ghar par hai. Unhe achanak kuch jaruri kaam aa gaya tha. Isliye un ne mujhse kaha ki, mai jakar tum logon ko le aau. Ab der mat kar, jaldi ghar chal. Sab tera intejar kar rahe hai.”

Mehul ki baat sunkar, mai keerti aura mi nimi ke sath bahar aa gaya. Bahar aakar humne apna saman gaadi me rakha aur ghar ke liye nikal pade. Raste me mai mehul se uncle ke baare me puchhta raha.

Kuch hi der me hum ghar pahuch gaye. Ghar me chhoti maa akeli thi. Un ne mujhe dekhte hi gale se laga liya aur fir puchha.

Chhoti maa boli “priya kaisi hai. Use koi pareshani to nahi hai.”

Mai bola “nahi chhoti maa, priya ab bilkul thik hai. Use kisi baat ki koi pareshani nahi hai.”

Chhoti maa boli “chal thik hai. Tu jakar muh hath dho le.”

Lekin mujhe chanda mausi ka khayal aaya aur maine chhoti maa se puchha.

Mai bola “chhoti maa, kya chanda mausi abhi bhi anu mausi ke hi ghar me hai.”

Chhoti maa boli “haan chanda mausi abhi anu didi ke par hi hai.”

Mai bola “chhoti maa, mai jakar chanda mausi se mil kar aata hu. Fir aakar muh hath dho luga.”

Lekin chhoti maa ne mujhe tokte huye kaha.

Chhoti maa boli “nahi, pahle tu muh hath dho le. Fir hum sab wahi chalte hai. Hume raat ka khana didi ke ghar par hi khana hai.”

Chhoti maa ki baat sunkar, mai upar apne kamre me aa gaya. Keerti aur ami nimi bhi taiyar hone ke liye apne apne kamre me chali gayi. Kamre me aakar mai fresh hone chala gaya.

Fresh hone ke bad mai taiyar hone laga. Abhi mai taiyar ho hi raha tha ki, tabhi keerti aa gayi. Wo taiyar ho chuki thi. Use itni jaldi taiyar dekh kar, maine use tokte huye kaha.

Mai bola “tu to badi jaldi taiyar ho gayi.”

Keerti boli “mai hi nahi, ami nimi bhi kab ki taiyar ho chuki hai. Tumhe hi taiyar hone me itna jyada samay lagta hai.”

Mai bola “aisi baat nahi hai. Din bhar ki thakan thi. Isliye thakan door karne kiye nahane laga tha. Warna mai bhi abhi tak taiyar ho chuka hota.”

Keerti boli “chalo koi baat nahi. Lekin ab jaldi karo, niche sab tumhare aane ka intejar kar rahe hai.”

Keerti ki baat sunkar, mai jaldi jaldi taiyar hua aur fir uske sath niche aa gaya. Niche vaani didi baithi thi. Mujhe dekhte hi, wo uth kar khadi ho gayi. Mai unse milne unke pas gaya to, un ne mujhe gale se lagate huye kaha.

Vaani didi boli “tum logon ko aane me koi takleef to nahi huyi.”

Mai bola “nahi didi, waha ajay aur raj logon ke hote huye kisi baat ki koi pareshani nahi hoti hai.”

Vaani didi boli “chalo acha hai. Ab priya ki tabiyat kaisi hai.”

Mai bola “didi, ab priya bhi pahle se bahut achi hai. Lekin nidhi didi ne abhi use ek hafte aaram karne ko kaha hai.”

Vaani didi abhi mujhse iske bad kuch aur pati ki, tabhi chhoti maa ne hume tokte huye kaha.

Chhoti maa boli “vaani beta, apni baten tu anu didi ke ghar par kar lena. Waha sab humara intejar kar rahe hai. Ab hume chalna chahiye.”

Chhoti maa ki is baat par vaani didi ne bhi apni sahmati di aur fir hum sab anu mausi ke ghar jaane ke liye nikal pade. Hum jyada log the isliye vaani didi ne tata safari nikali aur hum sab usi me anu mausi ke ghar aa gaye.

Anu mausi ke ghar pahuchne ke bad, humne doorbell bajayi to, anu mausi ne aakar darwaja khola. Mujhe apne samne dekhte hi, un ne bhi mujhe apne gale se laga liya aur sawalon ki bauchhar karte huye kaha.

Anu mausi boli “kaha tha tu, aane me itni der kyo laga di. Hum kab se tera intejar kar rahe hai. Priya kaisi hai. Wo thik to hai na.”

Anu mausi ke itne saare sawal sunkar, maine sabse pahle unke aakhiri sawal ka jabab dete huye kaha.

Mai bola “mausi, priya ab bilkul thik hai.”

Mai abhi itna hi bol paya tha ki, chhoti maa ne anu mausi ko tokte huye kaha.

Chhoti maa boli “didi, aap ye sab haal chaal bad me le lena. Pahle in logon ko chanda mausi se mil lene dijiye.”

Chhoti maa ki ye baat sunkar, hum sab ghar ke andar aa gaye. Fir anu mausi hume us kamre me le aayi. Jis kamre me aksar chhoti maa ruka karti thi. Waha chanda mausi bed par baithi huyi thi.

Dushyant mausa ji aur neha bhi unke agal bagal khade huye the. Lekin chanda mausi kuch pareshan si lag rahi thi. Hum unke pas pahuche to, mai unke pas jakar baith gaya aur unki tabiyat puchhne laga.

Lekin chanda mausi ne mujhe apne pas dekhte hi, mujhe apne gale se laga liya aur rona suru kar diya. Is samay unki tabiyat sahi nahi thi aur rone se unki sehat par bura asar bhi pad sakta tha.

Isliye unke rone se mujhe unki tabiyat kharab hone ki chinta satane lagi. Mai unke gale se alag hua aur maine unke aanus ponchhte huye kaha.

Mai bola “mausi, ab to sab thik ho gaya. Ab aap kyo ro rahi hai.”

Lekin chanda mausi ne meri baat ko ansuna kar diya aur mujhse lipat kar fir se foot foot kar rona suru kar diya. Ab mujhe unki aur bhi jyada chinta hone lagi thi. Isliye maine unhe samjhate huye kaha.

Mai bola “mausi, abhi aapki tabiyat sahi nahi hai. Aapke is tarah rone se aapko tabiyat aur bhi jyada kharab ho jayegi. Plz aap rona band kijiye.”

Magar chanda mausi par meri is baat ka koi asar nahi pada. Wo abhi bhi pahle ki tarah hi roye ja rahi thi. Un par apni is baat ka koi asar padte na dekh kar, maine ami nimi ko apne pas aane ka ishara kiya aur chanda mausi se kaha.

Mai bola “mausi, aap roye ja rahi hai aur yaha ami nimi kab se aapse milne ke liye khadi hai.”

Meri baat sunkar, chanda mausi kin ajar ami nimi par padi. Maine ami nimi ko unke pas khada kiya to, un ne ami nimi se lipat kar rona suru kar diya. Mujhe unke is tarah se rone ka matlab samajh me nahi aa raha tha.

Abhi tak mujhe lag raha tha ki, mujhe itne din bad dekh kar wo ro rahi hai. Lekin ab mujhe aisa lag raha tha ki, jaise koi baat unhe pareshan kar rahi hai aur wo isi vajah se roye ja rahi hai.

Magar abhi wo baat janne se jyada jaruri mausi ko chup karana tha. Isliye maine ami nimi ko unse door kiya aur unke aanus ponchhte huye kaha.

Mai bola “mausi, aapko meri kasam hai. Ab aap bilkul bhi nahi royegi. Aise rone se sach me aapki taiyat kharab ho jayegi.”

Meri baat sunkar, chanda mausi ek baar fir mujhse lipat gayi. Lekin is baar unka rona kam ho gaya tha. Unka rona kam hote dekh kar, mai unhe samjhane laga aur dhire dhire unka rona band hoga.

Unka rona band hote dekh kar, maine unke rone ki vajah janne ke liye anu mausi ki taraf dekha. Lekin mujhse najar milte hi, anu mausi ne sabse kaha.

Anu mausi boli “jab tak tum log chanda se milo. Tab tak mai sabke liye khana lagati hu.”

Itna kah kar anu mausi bina kisi ka jabab sune hi kitchen ki taraf chali gayi. Mera man unke pas jakar is baat ko janne ka tha. Lekin chanda mausi ko aisi haalat me chhodna bhi mujhe acha nahi lag raha tha.

Isliye mai unke pas hi baitha raha. Tab tak shayad keerti ko bhi waha ke haalat samajh me aa chuke the. Isliye wo bhi chanda mausi ke pas aa gayi aur unhe muambai me ami nimi ki shararaton ke baare me batane lagi.

Ami nimi bhi uske pas hi khadi thi. Apni baat hote dekh kar, wo dono bhi chanda mausi ke pas jakar baith gayi aur unhe is baat me apni safayi dene lagi. Chanda mausi bade dhyan se un logon ki baton ko sun rahi thi.

Kuch der bad ami nimi aur keerti ki is nok jhok ko dekh kar chanda mausi ke chehre par muskurahat aa gayi aur wo ami nimi ko laad karne lagi. Is baat ko lekar keerti chanda mausi se hi ladne lagi.

Chanda mausi keerti ko naraj hote dekh kar, use pyar se samjhane lagi aur mahaul puri tarah se shant ho gaya. Keerti ne apni nok jhok se thodi hi der me waha ka mahaul badal kar rakh diya tha.

Mai khamoshi se khada keerti aur ami nimi ki in harkaton ka maja le raha tha. Kuch der tak keerti aura mi nimi kin ok jhok ka daur aise hi chalta raha. Fir anu mausi aa gayi aur un ne aate hi sab se kaha.

Anu mausi boli “chalo, khana lag gaya hai. Sab chal kar khana kha lo aur ab chanda ko aaram karne do.”

Anu mausi ki ye baat sunkar, maine unhe tokte huye kaha.

Mai bola “mausi, pahle chanda mausi ko bhi khana kha lene dijiye. Fir wo dawa khakar aaram kar legi.”

Meri ye baat sunte hi, anu mausi ne mujhe taana marte huye kaha.

Anu mausi boli “ye lo, chanda ki fikar karne wala aa gaya. Hume to jaise chanda ki koi fikar hi nahi hai. Chanda ki fikar karne ka saara theka jaise isi ne le rakha ho.”

Anu mausi ki ye baat sunkar, maine unhe is baat me apni safayi dete huye kaha.

Mai bola “mausi, meri baat ka ye matlab nahi tha. Mai to sirf itna kahna chahta tha ki, chanda mausi pahle khana aur dawa kha leti. Fir aaram se so jati. Warna fir se unhe khana aur dawa ke liye jagana pad jata.”

Lekin meri is baat par bhi anu mausi ke tevar nahi badle aur un ne fir se mujhe taana marte huye kaha.

Anu mausi boli “haan, haan, hume to kuch aata hi nahi hai. Sab kuch tumhe hi aata hai. Itne din se tum hi to chanda ka khayal rakh rahe the. Humne to kuch kiya hi nahi hai.”

Anu mausi ki is baat ko sunkar, mera chehra chhota sa ho gaya. Mujhse anu mausi se kuch bhi kahte nahi ban raha tha. Chanda mausi ne mujhe is tarah pareshan dekha to, humari baat ke bich me bolte huye kaha.

Chanda mausi boli “punnu baba, aap pareshan mat hoiye. Anu didi mujhe pahle hi khana aur dawa de chuki hai. Wo abhi sirf aap se majak kar rahi hai aur aapko pareshan kar rahi hai.”

Chanda mausi ki baat sunkar, mai anu mausi ko dekhne laga. Ye anu mausi ki suru se aadat thi ki, wo mujhe pareshan karne ka koi bhi mauka apne hath se nahi jaane deti thi.

Shayad unki yahi aadat keerti ne bhi virasat me payi thi aur wo bhi mujhe pareshan karne me kabhi pichhe nahi rahti thi. Anu mausi ne jab chanda mausi ki ye baat suni to, un ne chanda mausi se shikayat karte huye kaha.

Anu mausi boli “chanda ye kya hai. Tum se thodi der bhi chup nahi raha gaya. Jara iska chehra to dekhna tha. Kaisa ho gaya tha.”

Ye kah kar anu mausi hasne lagi. Lekin chanda mausi ne meri tarafdari lete huye kaha.

Chanda mausi boli “nahi didi, mujhse baba ka utra hua chehra nahi dekha jata hai. Baba aise hi haste muskurate ache lagte hai.”

Iske bad chhoti maa ne chanda mausi se kuch jaruri baat karne ki baat kah kar hum sab ko bahar bhej diya. Vaani didi bhi unhi ke pas ruk gayi aur hum sab waha se dining room me aa gaye.

Hum dining room me pahuche to, waha mausa ji ke sath papa bhi the. Papa ko dekh kar, mera man waha se wapas aane ko hua. Lekin tab tak mausa ji kin ajar mujh par pad chuki thi.

Mausa ji mujhse mera haal chaal puchhne lage. Mai unse priya ke baare me baat karne se bachna chahta tha. Kyoki mujhe nahi malum tha ki, chhoti maa ne unhe is baare me kya bataya hai.

Abhi chhoti maa aur vaani didi bhi waha nahi thi. Isliye mai apne baare me hi unse bada chada kar unse baat karne laga aur unhe apni inhi baton me uljhane ki koshish karne laga.

Abhi meri mausa ji se ye hi baten chal rahi thi ki, tabhi chhoti maa aur vaani didi aa gayi. Vaani didi ne abhi bhi mujhe waha par khade hi dekha to, mujhe tokte huye kaha.

Vaani didi boli “kya hua, kya tumhe khana nahi khana hai, jo abhi tak yahi khade ho.”

Vaani didi ki is baat ko sunkar, maine unhe mausa ji ko apna haal chaal dene ki safayi di. Iske bad mai jaise hi khana khane baithne ko hua, waise hi barkha didi ka call aane laga.

Mai barkha didi ka call utha kar, unse baat karne laga. Mujhe barkha didi se baat karte dekh kar, keerti fauran uth kar apne kamre me chali gayi. Thodi der bad wo apne kamre se wapas aayi to, usne mujhe ek hands free pakda di.

Shayad wo barkha didi ka call dekh kar, samajh gayi thi ki, ab meri baat lambi chalne wali hai. Isliye wo mere liye apni hands free le aayi thi. Maine hands free lagayi aur barkha didi se baat karte karte mai bhi khana khane baith gaya.

Ab dining table ka najara kuch aisa tha. Dining table ki bich wali seat par papa baithe huye the. Unke left wali seat par mausa ji, mausi ji, kamal, dushyant mausa ji, neha aur mehul baithe huye the.

Papa ki right wali seat me, chhoti maa, vaani didi, nimi, ami, keerti aur fir mai baitha hua tha. Mujhe dushyant mausa ji ko papa ke sath khana khane baitha dekh kar, bahut tajjub ho raha tha.

Keerti ne mujhe bataya tha ki, dushyant mausa ji ne papa se dushmani ki vajah se hi meri jaan lene ki koshish kit hi aur unki is galti ke liye chanda mausi ne unhe sirf meri vajah se maaf kiya tha.

Lekin mujhe ye baat samajh me nahi aa rahi thi ki, papa aur dushyant mausa ji ke bich sulah kisne karwayi hai. Isi baat ko sochte sochte achanak meri najar papa par padi to, wo bade gaur se mujhe hi dekh rahe the.

Shayad unhe khana khate samay meri kisi se baat karne ki harkat kuch ajib lag rahi thi. Lekin maine papa ki is baat ko andekha kiya aur fir se barkha didi se baat karne laga.

Yadi riya ke ghar me humare khana khane ki baat ko chhod diya jaye to, do saal me ye pahla mauka tha, jab hum bap bête ek sath pure parivar ke sath baith kar khana kha rahe the.

Lekin mere man me mere bap ke liye itni nafrat thi ki, mujhe is baat se jara bhi khushi nahi thi. Mai barkha didi se baat karte huye khana suru karne wala tha ki, tabhi meri najar keerti ke khane par padi.

Uske khane me abhi uble aalu, palak ka soup, methi ki sabzi aur chapati thi. Maine bhi uske samne rakhi aalu aur chapati uthayi aur apni plate me rakh kar unhe khane laga.

Mai Mumbai me bhi jab uske sath khana khata tha to, usi ke liye bana hua khana khaya karta tha. Jiski vajah se keerti ne bhi wo khana khushi khushi khana suru kar diya tha.

Abhi bhi jab usne mujhe ye khana lete dekha to, wo muskurane lagi. Lekin usne kuch kaha nahi aur khamoshi se wo bhi khana khane lagi. Abhi mai aur keerti ye khana kha hi rahe the ki, tabhi ami ne keerti ko tokte huye kaha.

Ami boli “didi, mujhe bhi aalu aur chapati khana hai.”

Ami ki ye baat sunkar, keerti ne use samjhate huye kaha.

Keerti boli “ami, is khane me jara bhi mirch masala nahi hai. Ye tumhe bilkul acha nahi lagega. Tum ise mat khao.”

Keerti ki is baat par ami ne ne us se ulta sawal karte huye kaha.

Ami boli “yadi ye khana acha nahi hai to, fir bhaiya is khane ko kyo kha rahe hai.”

Keerti boli “ami, wo kya hai ki, mujhe ye khana jara bhi acha nahi lagta hai aur mai is khane ko khane me bahut na nukur karti hu. Isliye punnu mere sath dene ke liye ye khana kha raha hai. Taki mai khushi khushi ye khana kha saku.”

Keerti ki is baat ke jabab me ami ne kaha.

Ami boli “thik hai didi, fir mai bhi aapka sath dene ke liye ye khana khana chahti hu. Mujhe bhi ye khana do na.”

Keerti ami ko samjhane ki bahut koshish karti rahi. Lekin jab ami nahi maani to, keerti ne ami ko bhi aalu aur chapati khane ke liye de diye. Lekin ab keerti khana khate huye nimi ko dekh rahi thi.

Kuch der bad, nimi ki najar mere aur ami ke khane par pad gayi. Wo thodi der tak mere aur ami ke khane ko gaur se dekhti rahi. Fir achanak hi uski aankhon me aansu jhilmilane lage aur usne rona suru kar diya.