MmsBee कोई तो रोक लो

[desiaks]

{Update - 228}
____________________________

“Waise to ek ladki ko uske sasural bhejne ka kaam uske bap ya bhai ka hota hai. Lekin chanda mausi ka is duniya me humare siwa koi nahi hai. Fir ye kaam hum nahi karege to aur kaun karega.”

“Wo tumhe apna beta hi manti hai. Kya aise me tumhara farz nahi banta ki, apni maa saman mausi ko khushi khushi unke sasural ke liye vida karo. Maine apni taraf se tumhe samjha diya hai.”

“Ab aage tumko faisla karna hai ki, tum unko jindagi bhar apne ghar me hi rakhna chahte ho ya fir unhe unka apna aisa ghar saupna chahte ho. Jis ghar me wo rani ki tarah raj kare.”

Vaani didi ki is baat ne sach me mujhe soch me daal diya tha. Mai apni khushi ke liye chanda mausi ki bhalai ki baat bhool raha tha. Lekin ab mujhe vaani didi ki baat samajh me aa chuki thi. Isliye maine vaani didi se kaha.

Mai bola “thik hai didi, mai chanda mausi ko Mumbai jaane ke liye jarur taiyar karuga. Lekin iske pahle meri chhoti maa se ek request hai.”

Meri aadhi baat sunte hi, sabke chehre khushi se khil gaye the. Lekin meri baat puri hote hi sab gaur se mujhe dekhne lage. Meri request wali baat ne sabko kisi soch me daal diya tha.

Sab gaur se mujhe dekh rahe the. Lekin koi kuch bol nahi raha tha. Tabhi chhoti maa ne is khamoshi ko todte huye kaha.

Chhoti maa boli “haan bolo, tumhari kya request hai.”

Mai bola “chhoti maa, mai yaha nahi, aapko akele me apni request batauga.”

Meri is baat ka chhoti maa ne koi virodh nahi kiya aur wo mujhe waha se apni baat kahne ke liye keerti ke kamre me le aayi. Waha aane ke bad chhoti maa ne mujhse kaha.

Chhoti maa boli “yaha ab humare siwa koi nahi hai. Ab tum apni request mere samne rakh sakte ho.”

Lekin ab mujhe chhoti maa se apni request kahne me kuch hichak si ho rahi thi. Mujhe samajh me nahi aa raha tha ki, mujhe chhoti maa se itni badi baat karni chahiye ya nahi karni chahiye.

Mujhe is baat ka dar bhi sata raha tha ki, chhoti maa ko meri ye baat pasand bhi aati hai ya nahi. Bas isi uljhan ki vajah se mai chahte huye bhi, chhoti maa se apni baat kahne ki himmat nahi kar pa raha tha.

Shayad chhoti maa meri is halat ko samajh gayi thi. Isliye un ne mere is dar ko door karte huye kaha.

Chhoti maa boli “mai tumhari maa hu. Apni maa se apne dil ki baat kahne ke liye na to tumhe darna chahiye aur na hi is tarah sochna chahiye. Tumhari kya request hai. Tum behichak hokar bolo.”

Chhoti maa ki ye baat sunkar, mera hausla bada aur maine unse kaha.

Mai bola “chhoti maa, meri request bahut badi hai aur mai nahi janta ki, ye sahi hai ya galat hai. Ho sakta hai ki, ye aapko pasand na aaye. Isliye ise manne ya na manne ka faisla mai aap par chhodta hu.”

Chhoti maa boli “tum meri pasand napasand ki fikar mat karo. Tumhari khushi me hi meri khushi hai. Yadi mujhe tumhari requsest sahi lagi to, mai use jarur pura karugi. Tum nidar hokar apni request bolo.”

Mai bola “ji chhoti maa.”

Ye kahte huye mai chhoti maa ko apni request batane laga. Chhoti maa bade gaur se meri baat sun rahi thi. Meri baat puri hote hi, chhoti maa ke chehre par muskan aa gayi aur un ne mujhe apne gale se lagate huye kaha.

Chhoti maa boli “mai janti thi ki, tu ab bahut samajhdar ho gaya hai aur bahut badi badi baten karne laga hai. Lekin ye to mai bhi nahi janti thi ki, tu apne parivar ke logon ke liye itni gahri soch rakhta hai.”

“Maine bhi bahut kuch karne ke liye socha tha. Lekin ye baat mere dimag me bhi nahi aayi thi. Lekin tu fikar mat kar aur mujhe bas thoda sa samay de. Mai teri ye request jarur puri karugi.”

Chhoti maa ki ye baat sunkar, mera chehra khushi se khil utha aur maine khush hote huye kaha.

Mai bola “thanks chhoti maa, aap sach me duniya ki sabse achi maa ho.”

Meri baat sunkar, chhoti maa muskurane lagi aur un ne mere gaal par pyar se ek chapat lagate huye kaha.

Chhoti maa boli “chal, ab jyada maska lagane ki jarurat nahi hai. Ab jaldi se bahar chal, bahar sab humara intejar kar rahe hai.”

Mai bola “ji chhoti maa.”

Iske bad mai chhoti maa ke sath sabke pas drawing room me aa gaya. Lekin humare waha pahuchte hi, anu mausi ne mujhe gusse me aankh dikhate huye kaha.

Anu mausi boli “to tu ab humara koi kaam karne ke humare samne shart rakhne laga hai.”

Anu mausi ki ye baat sunkar, mai thoda saham gaya. Lekin chhoti maa ne fauran mera bachaw karte huye kaha.

Chhoti maa boli “didi, isne humare samne koi shart nahi rakhi hai. Isne to bas humare samne ek chhoti si request rakhi hai.”

Magar chhoti maa ki ye baat sunkar bhi anu mausi ke tevar nahi badle aur un ne chhoti maa ki baat ko kaatte huye kaha.

Anu mausi boli “iski shart aur request me antar hi kya hai. Isne kaam karne ke badle hi to apni request rakhi hai. Matlab ki ab se hume isse apna koi kaam karwane ke liye iski baat bhi puri karna padegi.”

Anu mausi ki is baat par chhoti maa ne unhe samjhate huye kaha.

Chhoti maa boli “nahi didi, jaisa aap soch rahi hai, waisa kuch bhi nahi hai. Isne humare samne request jarur rakhi hai. Lekin use manna ya na manna humare upar chhod diya hai. Mujhe apne bête ki is baat par garv hai.”

Ye kahte huye chhoti maa ne mere kandhe par hath rakha aur mujhe apne kandhe se laga liya. Wahi anu mausi ne bhi naram padte huye chhoti maa se puchha.

Anu mausi boli “acha, jara mai bhi to sunu ki, iski aisi kaun si request hai, jise sunkar tujhe is par garv hone laga hai.”

Lekin chhoti maa ne unhe meri request batane se inkar karte huye kaha.

Chhoti maa boli “nahi didi, abhi mai iski request aapko nahi bata sakti. Pahle mujhe iski request ko puri kar lene dijiye. Fir mai aap sabko iski request bataugi.”

Anu mausi boli “dekh sonu, ab tu apne bête ki tarah jyada nakhre mat kar aur sidhe tarah se iski request hum sabko bata de.”

Lekin chhoti maa ne anu mausi ko meri request puri hone ke pahle batane se saaf mana kar diya. Chhoti maa ko meri request batate na dekh kar, baki sab bhi request batane ke liye kahne lage.

Magar chhoti maa kisi ki bhi baat sunne ke liye taiyar nahi huyi aur sabse intejar karne ke liye kahti rahi. Aakhir me chhoti maa ki is jid ke aage sabko jhukna pad gaya aur sabne unki baat maan li.

Vaani didi is pure wakye ko badi khamoshi se dekh rahi thi. Un ne chhoti maa se is baare me janne ki koi koshish nahi ki thi. Lekin jaise hi sab shant hokar baith gaye to, un ne mujhse kaha.

Vaani didi boli “ab to mausi ne tumhari request puri karne ki baat kah di hai. Ab tum chanda mausi ko Mumbai jaane ke liye kab taiyar kar rahe ho.”

Mai bola “didi, mai kal hi school se aane ke bad, mausi se is baare me baat karta hu.”

Vaani didi boli “ye to bahut achi baat hai. Yadi tumne kal hi mausi ko Mumbai jaane ke liye taiyar kar liya to, fir mausi bhi Saturday ko tum logon ke sath Mumbai ja sakegi.”

Mausi ke hum logon ke sath Mumbai jaane ki baat sunkar, maine vaani didi se puchha.

Mai bola “didi, hum logon ke sath kaun kaun Mumbai jayega.”

Vaani didi boli “abhi humne is baare me kuch socha nahi hai. Lekin tum aur ami nimi to Mumbai ja hi rahe ho. Yadi chanda mausi bhi taiyar ho gayi to, fir chanda mausi, dushyant mausa ji aur neha bhi tumhare sath hi jayege.”

Iske bad vaani didi sabse isi baare me baten karne lagi. Lekin unki sabse ajib baat ye thi ki, wo bich bich me papa se bhi is baare me salah mashwara kar rahi thi aur papa bade ukhde huye mood se unki haan me haan mila rahe the.

Mujhe vaani didi ki ye baat jara bhi pasand nahi aa rahi thi aur mai samajh nahi pa raha tha ki, vaani didi is baat ke liye us jaise jalil aadmi se koi salah mashwara kyo kar rahi hai.

Is dauran dushyant mausa ji bhi pure samay khamosh hi rahe. Wo bhi bas vaani didi ki har baat me haan me haan mila rahe the. Maine unko papa se ya papa ko unse abhi tak koi bhi baat karte nahi dekha tha.

Mujhe ye baat bhi samajh me nahi aa rahi thi ki, yadi papa aur dushyant mausa ji ke bich sulah ho gayi hai to, fir dono aapas me baat kyo nahi kar rahe hai. Ye baat bhi mere liye ek paheli hi bani huyi thi.

Mere man me is samay hajaron sawal uth rahe the. Jinke jabab mujhe vaani didi, chhoti maa, anu mausi, richa aunty ya chanda mausi hi de sakti thi. Lekin anu mausi se kiye vade ki vajah se mai kisi se koi sawal nahi kar pa raha tha.

Mai apni isi uljhan me uljha hua tha. Tabhi meri najar chhoti maa par padi. Wo gaur se mujhe hi dekh rahi thi. Lekin meri unse najar milte hi, wo vaani didi se raat jyada hone ki baat kah kar ghar chalne ko kahne lagi.

Jiske bad vaani didi ghar chalne ke liye uth kar khadi ho gayi. Un ne papa se bhi sath hi ghar chalne ko kaha to, papa ne kah diya ki, unhe abhi mausa ji se kuch jaruri baten karna hai. Isliye wo aaj raat mausa ji ke ghar par hi rukege.

Mujhe papa ke mausa ji ke yaha rukne se koi pareshani nahi thi. Magar neha ka waha hona mere man me khatak raha tha. Waise to dushyant mausa ji ke waha hone ki vajah se papa ka koi harkat kar pana sambhav nahi tha.

Lekin fir bhi mai nahi chahta tha ki, mere bap ki kisi harkat ki vajah se fir mujhe kisi ke samne sharminda hona pade. Mai riya ki tarah neha ke mamle me koi jokhim lena nahi chahta tha. Isliye maine neha se kaha.

Mai bola “neha, mai abhi yaha nahi tha. Isliye mai tumhe apna ghar dikha nahi paya. Kya tum mere ghar chalna pasand karogi. Chaho to subah wapas aa jana.”

Meri ye baat sunte hi, neha ne khush hote huye kaha.

Neha boli “haan, haan, jarur chalugi.”

Iske bad usne dushyant mausa ji se puchha.

Neha boli “baba, kya mai punnu ke sath uske ghar chali jau. Subah aa jaugi.”

Neha ki is baat par pahli baar dushynat mausa ji ne muskurate huye kaha.

Dushyant mausa ji bole “haan, tum shauk se ja sakti ho. Isme puchhne wali baat kya hai.”

Dushyant mausa ji ki baat sunte hi, neha ne mujhse kaha.

Neha boli “tum 2 min ruko, mai abhi apne kapde lekar aati hu.”

Ye kah kar neha apne kamere me chali gayi. Keerti bade gaur se meri is harkat ko dekh rahi thi. Shayad wo samajh gayi thi ki, maine aisa kyo kiya hai. Lekin mai iske siwa kar bhi kya sakta tha.

Mere pas apne dil ka dar nikalne ke liye aisa karne ke alawa koi rasta bhi to nahi tha. Mai apne bap ki jalil harkaton se bachne ke liye jo rasta apna sakta tha, wo hi rasta apna raha tha.

Kuch hi der me neha apne kapde lekar aa gayi. Iske bad humne sabse ijajat li aur ghar jaane ke liye nikalne lage. Lekin tabhi dushyant mausa ji ne mujhe rokte huye kaha.

Dushyant mausa ji bole “punnu beta, meri galti maafi ke layak to nahi hai. Lekin yadi ho sake to, mujhe maaf kar do.”

Mai bola “mausa ji, aap ye kis galti ki baat kar rahe hai. Mujhe to aapki koi galti yaad hi nahi aati hai. Plz aap mujhse maafi maang kar mujhe sharminda mat kijiye.”

Meri is baat ko sunkar, dushyant mausa ji ne mere samne hath jodte huye kaha.

Dushyant mausa ji bole “nahi beta, ye tumhara badappan hai ki, tum itna sab ho jaane ke bad bhi meri koi galti nahi mante ho. Lekin sach yahi hai ki, maine tumhari jaan lene ki koshish ki thi.”

“Shayad meri is galti ke liye mujhe upar wala bhi maaf nahi karega. Lekin yadi tum mujhe is galti ke liye maaf kar do to, kam se kam mere dil se ek bojh utar jayega aur mai tumhari mausi se najar milane ke layak ho jauga.”

Mai bola “mausa ji, mujhe sach me kisi baat me aapki koi galti najar nahi aati hai. Mujhe to aapki sirf wo achchaiyan yaad aati hai, jo maine shikha didi ke ghar me dekhi thi.”

“Meri chhoti maa kahti hai ki, bado ke hath maafi mangte huye nahi, balki aashirwad dete huye hi ache lagte hai. Isliye aap mere samne hath jod kar meri mausi ko chhota mat kijiye aur mujhe sirf apna aashirwad dijiye.”

Meri baat sunkar, dushyant mausa ji ne mere sar par hath fera aur mujhe apne gale se laga liya. Unse mil lene ke bad, hum sab ghar ke liye nikal pade. Pahle humne mehul ko uske ghar chhoda aur fir hum apne ghar aa gaye.

Hume ghar pahuchte pahuchte 11:30 baj gaye the. Raat jyada ho gayi thi. Isliye sab ghar aate hi apne apne kamre me chale gaye. Chhoti maa ne neha ko chanda mausi ke kamre me thahra diya.

Maine neha se thodi bahut baat ki aur fir apne kamre me aa gaya. Mai kamre me pahucha to, ami nimi dono hi mere kamre me baithi huyi thi. Unhe abhi tak baitha dekh kar, maine unke pas baithte huye kaha.

Mai bola “tum dono aaram se yaha kyo baithi ho. Kya kal school nahi jana hai.”

Meri ye baat sunkar, ami ne bade hi bholepan se kaha.

Ami boli “bhaiya, hum aaj hi to itne lambe safar se aaye hai. Kya humara kal se hi school jana jaruri hai.”

Ami ki baat sunkar, mai dhyan se uska chehra dekhne laga. Mere sath sath unka bhi school ka bahut nuksan ho chuka tha. Aise me mujhe unka apni padai ka aur jyada nuksan karna thik nahi lag raha tha.

Lekin ami ki ye baat bhi bilkul sahi thi. Wo log itne lambe safar se aayi thi. Aise me unhe apne safar ki thakan ko mitane ke liye kam se kam ek din ki chhutti to milna hi chahiye thi.

Mai apni dono masum bahno ko koi kasht dena nahi chahta tha. Lekin unki padai ka nuksan bhi karna nahi chahta tha. Abhi mai apni isi soch me uljha hua tha ki, ami ne fir se apni baat ko dohrate huye kaha.

Ami boli “boliye na bhaiya, kya humara kal se hi school jana jaruri hai.”

Ami ki is baat par maine muskurate huye kaha.

Mai bola “nahi, tumhara kal se hi school jana koi jaruri nahi hai. Tum log parso se school chali jana. Lekin humari padai ka bahut nuksan ho chuka hai. Isliye ab hume man laga kar padai karna hai.”

“Ab tum logon ko apna khelna kudna kam karke padai me apna man lagana hoga. Tum kal aaram karke parso se apni padai suru kar lena. Magar mai to kal se hi school jauga aur ghar aane ke bad bhi padai karuga.”

Meri ye baat sunkar, nimi to bahut khush ho gayi. Lekin ami ne kuch sochte huye kaha.

Ami boli “bhaiya, yadi aap kaho to, hum log bhi kal se hi school jana suru kar dete hai.”

Ami ki ye baat sunkar, nimi ko jhatka sa laga aur uske chehre ki saari khushi gayab ho gayi. Wo fati fati aankhon se ami ko dekhne lagi. Mujhe nimi ki is halat par hansi aa gayi aur maine muskurate huye ami se kaha.

Mai bola “nahi, iski koi jarurat nahi hai. Tum log safar se thaki huyi ho. Tum log parso se hi school jana.”

Meri ye baat sunte hi, nimi ki khush wapas laut aayi aur usne bade hi joshile andaz me kaha.

Nimi boli “bhaiya, aap humari padai ki fikar mat karo. Hum log kal se hi apni padai suru kar dege aur parso se school bhi jaane lagege.”

Nimi ki baat sunkar, mere chehre par muskurahat aa gayi. Mai uski aadat ache se janta tha. Us se bada jhutha duniya me koi dusra nahi tha. Wo apna kaam nikalne ke liye bina soche samjhe kuch bhi kah jati thi.

Magar uski in nadani bhari harkaton ki vajah se kisi tanav me bhi mere chehre par muskurahat aa jati thi. Aisa hi kuch abhi bhi mere sath hua tha. Nimi ki baat sunkar mere chehre par muskurahat aa gayi aur maine un dono se kaha.

Mai bola “chalo thik hai. Ab raat jyada ho gayi hai. Ab tum dono jakar so jao.”

Meri baat sunkar, dono ne mujhe good night kaha aur apne kamre me chali gayi. Unke jaane ke bad, maine kapde badle aur bed par let kar keerti ke aane ka intejar karne laga.

Tabhi meri najar bed par hi pade priya ke mobile par padi. Mai jaldi jaldi taiyar hone ke chakkar me us mobile ko ghar par hi bhool gaya tha. Maine mobile utha kar dekha to, usme priya ke 10-12 call the.

Priya ke is pagalpan ko dekh kar mujhe hansi aa gayi. Aaj bhi usne mere mobile par call na karke sirf apne wale mobile par hi call kiye the. Mera man priya se baat karne ka karne laga.

Lekin maine samay dekha to, 12 baj chuka tha. Isliye maine priya ko call lagane ka apna irada badal diya. Tabhi keerti bhi aa gayi. Usne aate hi darwaja band kiya aur fir mere pas aakar baithte huye kaha.

Keerti boli “yun akele baithe baithe kya soch rahe ho.”

Keerti ki is baat ko sunkar maine use priya ki harkat batate huye kaha.

Mai bola “kuch nahi, ye priya bhi puri pagal hai. Usne apne wale mobile par 10-12 call kiye hai. Lekin mere mobile par ek bhi call nahi kiya. Bas isi baare me soch raha tha.”

Keerti boli “isme sochna kya hai. Use call laga lo aur use bata do ki, tum abhi abhi ghar aaye ho.”

Mai bola “nahi, ab 12 baj gaye hai aur uski tabiyat bhi sahi nahi hai. Aise me use nind se jagana achi baat nahi hai.”

Keerti boli “to fir ek kaam karo. Tum abhi use ek msg kar do. Taki kal tumhare kahne ke liye rah jaye ki, tumne ghar aate hi use msg kiya tha.”

Mujhe keerti ki ye baat sahi lagi aur mai apne mobile me msg dudne laga. Lekin keerti ne meri is pareshani ko bhi hal kar diya aur apne mobile se mujhe ek msg send kar diya. Maine wahi msg priya ko bhej diya.

Mera Sms “Gam Na Ho Waha Jaha Ho Fasana Tera.
Khushiyan Dudti Rahe Aashiyana Tera.
Wo Wakt Hi Na Aaye Jab Tu Udas Ho.
Ye Duniya Bhula Na Sake Muskurana Tera.”

______________________________