MmsBee कोई तो रोक लो

[desiaks]

{Update - 229}
____________________________

Keerti boli “yun akele baithe baithe kya soch rahe ho.”

Keerti ki is baat ko sunkar maine use priya ki harkat batate huye kaha.

Mai bola “kuch nahi, ye priya bhi puri pagal hai. Usne apne wale mobile par 10-12 call kiye hai. Lekin mere mobile par ek bhi call nahi kiya. Bas isi baare me soch raha tha.”

Keerti boli “isme sochna kya hai. Use call laga lo aur use bata do ki, tum abhi abhi ghar aaye ho.”

Mai bola “nahi, ab 12 baj gaye hai aur uski tabiyat bhi sahi nahi hai. Aise me use nind se jagana achi baat nahi hai.”

Keerti boli “to fir ek kaam karo. Tum abhi use ek msg kar do. Taki kal tumhare kahne ke liye rah jaye ki, tumne ghar aate hi use msg kiya tha.”

Mujhe keerti ki ye baat sahi lagi aur mai apne mobile me msg dudne laga. Lekin keerti ne meri is pareshani ko bhi hal kar diya aur apne mobile se mujhe ek msg send kar diya. Maine wahi msg priya ko bhej diya.

Mera Sms “Gam Na Ho Waha Jaha Ho Fasana Tera.
Khushiyan Dudti Rahe Aashiyana Tera.
Wo Wakt Hi Na Aaye Jab Tu Udas Ho.
Ye Duniya Bhula Na Sake Muskurana Tera.”

Maine priya ko msg bheja aur fir keerti se baat karne laga. Lekin thodi hi der bad priya ka call aane laga. Mai priya ko call uthane laga. Tabhi keerti ne mujhe apni hands free thama di.

Mai uski is harkat ka matlab samajha gaya tha. Maine hands free lagayi to, keerti ne apne ek kaan me hands free laga li. Maine hands free lagane ke bad priya ka call uthate huye kaha.

Mai bola “sorry yaar, maine itni raat ko msg karke tumhe bevajah nind se jaga diya hai.”

Meri is baat par priya ne hanste huye kaha.

Priya boli “tum nind se mujhe tab jagate, jab mai so rahi hoti. Mai to jag rahi thi aur jab tumhara msg aaya, tab mai Tv dekh rahi thi.”

Priya ki ye baat sunkar, maine us par gussa hote huye kaha.

Mai bola “priya ye kya hai. Abhi tumhari tabiyat sahi nahi hai aur jag kar Tv dekh rahi ho. Tumhe to abhi tak so jana chahiye tha.”

Priya boli “are aisi baat nahi hai. Mai airport se aane ke bad hi so gayi thi. Uske bad nikki ke jagane khane ke samay par uthi hu. Isliye ab mujhe nind nahi aa rahi thi to, mai Tv dekhne lagi thi.”

Mai bola “chalo thik hai. Lekin abhi tum par dawaiyon ka asar hai. Yadi tum sone ki koshish karogi to, tumhe nind bhi aa jayegi. Isliye ab tumhe so jana chahiye.”

Priya boli “ok, mai abhi so jaugi. Lekin pls tum thodi der baat karo na.”

Mujhe priya ka dil todna acha nahi laga aur maine us se kaha.

Mai bola “thik hai, mai tumse 10 min baat karta hu. Lekin uske bad tum koi jid nahi karogi aur so jaugi.”

Priya boli “ok, tum 10 min baat karo, uske bad mai tumse koi jid nahi karugi aur so jaugi.”

Mai bola “ahca chalo thik hai. Ab ye batao ki, tumne mujhe apne dusre mobile par 10-12 call lagaye hai. Lekin mere maobile par koi bhi call nahi kiya. Tumne aisa kyo kiya.”

Priya boli “maine tumhare mobile par call isliye nahi kiya tha. Kyoki mai ye dekhna chahti thi, tum mere mobile ko kabhi dekhte bhi ho ya sirf use apne pas rakhe huye hai.”

Priya ki is baat par mujhe aur keerti dono ko hansi aa gayi. Maine hanste huye priya se puchha.

Mai bola “acha to fir tumne kya dekha.”

Priya boli “maine dekha ki, tum mere mobile ko dekhte ho.”

Mai bola “chalo acha hua, tumhe mere upar viswas to aaya. Ab ye batao nikki kaisi hai. Wo to mere yaha aate hi mujhe bhool gayi. Usne to ek call tak karne ki jarurat nahi samjhi.”

Priya boli “nahi, aisi baat nahi hai. Abhi thodi der pahle nikki bhi mere pas thi. Wo bhi tumse baat karna chahti thi. Lekin tum mere itna call lagane ke bad bhi mera call nahi utha rahe the. Isliye nikki ne tumhe call nahi lagaya tha.”

Priya ki is baat par maine chaukte huye kaha.

Mai bola “kya tumne nikki ko bataya tha ki, tum mere dusre number par call laga rahi ho.”

Priya boli “mai use kyo batati ki, mai tumhare dusre number par call laga rahi hu. Yadi mai use ye baat bata deti to, wo tumhe call laga leti aur fir tumhe pata chal jata ki, mai tumhare dusre number par call laga rahi hu.”

Mai bola “tum sach me puri pagal ho. Na to tumne khud mujhse baat ki aur na hi nikki ko mujhse baat karne di. Yadi tumne nikki ko ye baat bata di hoti to, uske sath sath meri tumse bhi tabhi baat ho gayi hoti.”

Priya boli “haan, meri tumse baat ho gayi hoti. Lekin tab mujhe ye kaise pata chalta ki, tum mera mobile dekhte bhi ho ya nahi dekhte ho.”

Mai bola “tumhari ye baat thik hai. Lekin tumko ye bhi to sochna chahiye tha ki, abhi tumhare wale mobile me waha ka sim card hi dala hua hai aur ab wo roaming me hai. Aise me mai tumse us mobile se kaise baat kar sakta hu.”

Priya boli “mujhe kuch nahi sunna hai. Maine tumhe wo mobile apne baat karne ke liye diya hai aur mai kal se tumse usi mobile par baat karugi. Warna mai tumse baat nahi karugi.”

Mai bola “dekho priya, abhi is baat ki jid mat karo. Mai yaha aate hi, ek jaruri kaam me fas gaya hu. Isliye mai chahte huye bhi abhi naya sim card lene ke liye samay nahi nikal pauga.”

“Lekin mai tumse vada karta hu ki, do teen din ke andar mai naya sim card le luga. Tum mujhe bas do teen din ka samay do. Uske bad mai jarur tumse tumhare wale mobile par hi baat karuga.”

Meri ye baat sunkar, priya ko bhi meri pareshani ka aehsas ho gaya aur usne mujhe sim card badalne ke liye samay dete huye kaha.

Priya boli “ok, mai tumhe sim card badalne ke liye teen din ka samay deti hu. Lekin iske bad mai tumari koi baat nahi sunugi.”

Mai bola “thanks, mere liye itna samay kafi hai. Mai tumhe shikayat ka koi mauka nahi duga. Lekin yadi tumhare pas bhi aisa hi sim card hota to, acha hota. Kam se kam hum free me baat to kar sakte the.”

Meri is baat ko sunkar, priya ne hanste huye kaha.

Priya boli “tum mere sim card ki fikar mat karo. Mere pas tumhare jaisa hi dusra mobile bhi hai. Tum bas apna naya number lo, mai bhi tumhe apna dusra number de dugi.”

Priya ki is baat par maine chaukte huye kaha.

Mai bola “jab tumhare pas pahle se hi aisa dusra mobile tha to, tumne ye baat mujhe pahle kyo nahi batayi.”

Priya boli “ab tum itne buddhu ho to mai kya kar sakti hu. Mai to tumhe pahle hi bata chuki thi ki is company ke mobile aapas me free ho jate hai. Tumhe tabhi ye baat sochna chahiye thi ki, jab mere pas is company ka number nahi hai to, fir mai ye mobile tumhe kyo de rahi hu.”

Priya ki ye baat sunkar, mai soch me pad gaya. Uska kahna puri tarah se sahi tha. Jab usne mujhe mobile gift me diya tha. Tab mai uske aur keerti ke ek se mobile dekh kar ulajh gaya tha.

Mai bas is baare me soch raha tha ki, keerti ko dusra mobile lene ki kya jarurat pad gayi thi. Us samay mujhe priya ke pas dusra mobile hone ki baat sujhi hi nahi thi. Lekin ab jab mujhe is baare me pata chala to, maine priya se kaha.

Mai bola “sorry, us samay mai kisi aur soch me uljha hua tha. Isliye mujhe tumhare mobile ke baare me puchhne ka yaad hi nahi raha.”

Meri is baat par priya ne hanste huye kaha.

Priya boli “mujhe pata hai ki, tum us samay kis baat me uljhe the. Tumhe us samay is company ke mobile ke baare me kuch nahi pata tha. Lekin aisa hi ek mobile tumhare pas bhi tha.”

“Tumhare us mobile par tripti ke call aa rahe the. Shayad usne apna mobile free karwa liya tha. Isliye wo tumhare mobile par call kar rahi thi. Tumhe shayad tripti ki yahi baat samajh me nahi aa rahi thi.”

“Isliye tum is baat me ulajh gaye the aur mujhse is company ke mobile ke baare me sawal kar rahe the. Shayad tripti ke dusre mobile ki vajah se hi, tumhe mere dusre mobile ke baare me puchhne ka yaad nahi raha tha.”

Priya ki ye baat sunkar, mai uske dimag ki daad diye bina na rah saka. Usne itne tanav ke samay me hi is baat par gaur kar liya tha. Lekin uski is baat ne mere dimag me kayi sawal bhi paida kar diye the.

Magar mai chah kar bhi priya se is baare me kuch puchh nahi sakta tha aur na hi kuch puchh kar uske man me keerti ke liye shaq paida karna chahta tha. Isliye maine is baat se pichha chhudane ke liye priya se kaha.

Mai bola “chalo acha hai. Ab mai jab bhi naya sim card luga, tab mai us number ko free bhi karwa luga. Fir tum jitna chaho, utna mujhse baat kar sakogi.”

Priya boli “wo to tum nahi bhi kahte, tab bhi mai tumhe pareshan karne se baaj nahi aati.”

Mai abhi priya se baat kar hi raha tha ki, tabhi keerti ne mera dhayan samay ki taraf dilaya aur maine priya se kaha.

Mai bola “thik tum mujhe jitna chaho, utna pareshan kar lena. Lekin ab raat jyada ho chuki hai aur tumhe so jana chaiye. Tumne mujhse 10 min ka kah kar mujhe apni baton me uljha kar 30 min se jyada baat kar li hai.”

Meri ye baat sunkar, priya ne khilkhilate huye kaha.

Priya boli “ye to tumhari galti hai. Tumhe khud hi baton me samay ka dhyan nahi raha. Lekin ab mai tumhe pareshan nahi karugi. Ab mai rakhti hu, tum apna khayal rakhna. Good night.”

Mai bola “ok, tum bhi apna khayal rakhna aur Tv mat dekhna, sidhe so jana. Good night.”

Iske bad priya ne call rakh diya. Priya ke call rakhne ke bad, maine keerti ki hands free use wapas karte huye us se kaha.

Mai bola “tune suna na, priya abhi baat karne ke liye kya kah rahi thi. Mujhe samajh me nahi aa raha ki, mai us se kaise kahu ki, mai raat ko 9:30 baje se 10:30 baje tak barkha didi se aur fir 11 baje se 1 baje tak tujhse baat karta hu.”

Meri is baat ko sunkar, keerti ne mujhe samjhate huye kaha.

Keerti boli “tumhe abhi to kya, kabhi bhi priya se is baare me kuch kahne ki jarurat nahi hai. Tumhare khane ke samay par barkha didi se baat karne ki baat priya bhi ache se janti hai.”

“Isliye wo khud tumhe is samay par pareshan nahi karegi. Rahi mere samay par tumhare us se baat ki baat to, mujhe is baat me koi pareshani nahi hai. Tum jitni der chaho, utni der priya se baat kar sakte ho.”

“Mai is baare me kabhi tumse koi shikayat nahi karugi. Bas tum mera call bas utha liya karna. Tum jitni der priya se baat karoge, utni der mai tumhari aawaj sunkar hi khush rah lugi. Fir uske bad mai tumse baat kar lugi.”

Keerti ki ye baat sunkar, mere dil se ek bahut bada bojh utar gaya tha. Usne mujhe priya ka dil dukhane ki galti karne se rok liya tha. Keerti ki is baat par mujhe us par bahut pyar aaya aur maine jhatke se uske mathe ko chum liya.

Meri is harkat ko dekh kar, keerti mujhe ghoor kar dekhne lagi. Fir usne mujh par gussa karte huye kaha.

Keerti boli “tum apni harkat se baaj nahi aaoge. Maine tumse kaha bhi tha ki, abhi koi kissy vissy nahi lena. Magar tum meri koi baat sunte hi nahi ho.”

Keerti ko naraj hote dekh kar, maine use manate huye kaha.

Mai bola “dekh, ab tu naraj mat ho. Maine kaun sat ere hothon par kissy li hai. Maine mathe par hi to ek chhoti si kissy li hai.”

Keerti boli “nahi, matlab nahi. Jab tak doctor nahi kah deta hai ki, mai puri tarah se thik ho gayi hu. Tab tumhe koi kissy nahi milegi.”

Mai bola “thik hai meri maa. Ab jab tak doctor tujhe thik nahi kah deta. Tab tak mai koi kissy nahi karuga. Ab tu apna mood kharab mat kar.”

Meri ye baat sunkar, keerti ka gussa shant ho gaya. Iske bad wo mujhse neha ke humare ghar aane ke baare me sawal karne lagi. Maine use saaf saaf bata diya ki, mai neha ko kis liye ghar lekar aaya hu.

Meri baat sunne ke bad, wo mujhe isi baare me samjhati rahi aur mai bevajah papa par apna gussa nikalta raha. Kafi der tak hum logon ke bich is baare me baten chalti rahi.

Magar mera mood papa ki taraf se thik hone ko taiyar hi nahi tha. Jab keerti ne mera mood thik hote nahi dekha to, wo mujhse meri chhoti maa se ki gayi request ke baare me puchhne lagi.

Jiske bad mai use apni chhoti maa se ki gayi request ke baare me batane laga. Meri request ke baare me sunkar, keerti ke chehre par bhi muskurahat aa gayi. Iske bad hum log kafi der isi baare me baat karte rahe.

Fir 1 baje ke bad keerti mujhe good night kah kar apne kamre me chali gayi. Keerti ke jaane ke bad, mai usi ke baare me sochte sochte gahri nind ki aagosh me chala gaya.

Fir meri nind subah 6 baje khuli. Aaj se mujhe school jana tha. Isliye mai bina samay barbad kiye fresh hone chala gaya. Fresh hone ke bad, mai school ke liye taiyar hone laga.

Lekin taiyar hote hote achanak hi mujhe chanda mausi ki yaad aa gayi. Itne salon me ye pahla mauka tha ki, mai school ke liye taiyar ho raha tha aur mera nashta nahi aaya tha.

Warna mere fresh hokar nikalne ke bad, mera taiyar hona suru karte hi, na jaane chanda mausi ko kaise pata chal jata tha ki, mai taiyar ho raha hu aur wo nashta lekar mere kamre me aa jati thi.

Itne salon me unka ye niyam kabhi nahi toota tha. Chanda mausi ki ye baat yaad aate hi, mujhe bahut jyada unki kami ka aehsas satane laga aur na chahte huye bhi meri aankhon me aansuon ki nami aa gayi.

Is se pahle ki mai apni aankhon me chhayi is nami ko saaf kar pata. Us se pahle hi keerti mere kamre ka darwaja kholte huye kamre ke andar aa gayi. Use dekhte hi mai apni aankhon me chhayi nami ko saaf karne laga.

Lekin tab tak keerti meri aankhon ki is nami ko dekh chuki thi. Usne fauran hi mere pas aate huye puchha.

Keerti boli “tumhe kya hua hai. Tum subah subah ro kyo rahe ho.”

Tab tak mai apni aankhon ko saaf kar chukka tha. Maine keerti ki baat sunkar, muskurate huye kaha.

Mai bola “mujhe kuch nahi hua hai. Mai ro nahi raha tha, bas meri aankh me kuch chala gaya tha. Isliye tumhe aisa lag raha hai.”

Meri baat sunkar, keerti gaur se mera chehra dekhne lagi. Fir kuch sochte huye usne kaha.

Keerti boli “thik hai, tum taiyar ho. Mai abhi aati hu.”

Itna kah kar wo mere kamre se chali gayi aur mai taiyar hone laga. Taiyar hone ke bad mai apne school ka bag jama raha tha, tabhi keerti nashta lekar aa gayi. Maine nashta kiya aur fir niche aa gaya.

Mai niche aaya to, chhoti maa ami nimi ko aaj school na jaane ke upar se daant rahi thi. Vaani didi aur neha unke pas khadi khamoshi se ye tamasha dekh rahi thi. Ye dekh kar maine ami se puchha.

Mai bola “kya tum dono ne chhoti maa se bataya nahi hai ki, maine hi aaj tum dono ko school se chhutti karne ko kaha hai.”

Meri ye baat sunkar, ami ne mujhse kaha.

Ami boli “bhaiya, humne mummy ko ye baat batayi hai. Lekin fir bhi mummy hum par gussa kar rahi hai.”

Wahi dusri taraf nimi jo abhi tak khamoshi se chhoti maa ki daant sun rahi thi. Mujhe dekhte hi uski aankhon me aansu aa gaye aur usne fauran mere pas aate huye kaha.

Nimi boli “bhaiya, mummy ne hume bahut daanta hai aur hume ghar se nikal dene ka bhi bol rahi hai.”

Ye kahte huye wo bahut jyada sisakne lagi. Na jaane nimi ki siskiyon me kaun sa jahar tha ki, uski siskiyan sunkar mera seena chhalni ho jata tha aur mai uski siskiyon ke samne bilkul bebas sa ho jata tha.

Ye baat to wo khud bhi nahi janti thi ki, uski siskiyan mujh par kitna kahar dhati thi. Maine nimi ko sisakte dekha to, fauran uske pas aaya aur uske aansu ponchh kar, use apne seene se laga kar chup karane laga.

Jab nimi thoda shant huyi to, maine use apne seene se alag kiya aur chhoti maa par is baat ke liye gussa karte huye kaha.

Mai bola “chhoti maa, ye kya hai. Aap in dono ko kyo bekar me gussa kar rahi hai. Maine hi aaj in dono ko chhutti karne ko kaha tha.”

Lekin meri ye baat sunkar, chhoti maa ne mere ulta mere upar hi gussa karte huye kaha.

Chhoti maa boli “tujhe inki jyada tarafdari karne ki jarurat nahi hai. Mai Mumbai se hi inki nautanki dekhte aa rahi hu. Mai waha sirf vaani ki vajah se chup thi. Lekin ab mai inki koi bhi baat sahan nahi karugi. Inhe yadi mere ghar me rahna hai to, mere hisab se hi chalna hoga.”

Mai chhoti maa ki baton se samajh gaya tha ki, wo shayad ami nimi ki priya ko lekar ki gayi harkaton ki vajah se naraj hai. Isliye wo is bahane se un par gussa kiye ja rahi hai. Mai unki is narajgi ko door karna chahta tha.

Isliye unki baat ko khamoshi se sun raha tha. Lekin chhoti maa ki aakhiri me kahi baat mere dil ko lag gayi aur maine jindagi me pahli baar chhoti maa se badtamiji se baat karte huye kaha.

Mai bola “chhoti maa, aap aisa soch bhi kaise sakti hai. Itni chhoti chhoti bachchiyon se ye baat kahte huye aapko jara bhi sharam nahi aayi. Mai sab samajhta hu ki, aap in par kis baat ka gussa nikal rahi hai.”

“Lekin aap bhi meri baat kaan khol kar sun lijiye. Ye ghar inka hai aur is ghar me ye jaise chahe waise rahegi. Mere hote meri bahno se ye haq koi bhi nahi cheen sakta. Fir chahe wo aap hi kyo na ho.”

Mere itna kahte hi saara hall chatakkk ki aawaj se goonj gaya aur mera hath apne aap hi mere gaal par chala gaya. Vaani didi, keerti, neha aur ami nimi sabhi hairani se chhoti maa ko dekh rahe the. Lekin chhoti maa……”