MmsBee कोई तो रोक लो

[desiaks]

{Update - 247}
____________________________

Ami ki is baat ne mere sath sath baki sabko bhi chauka kar rakh diya tha. Priya ke meri bahan hone ki baat pata lagne ke bad se ye pahla mauka tha, jab ami khud se hi mujhe akele mumbai jaane ki ijajat de rahi thi.

Aaj ka din mere liye behad hi jhatkon bhara din tha. Aaj subah chhoti maa se thappad khane ke bad jhatka khane ki jo suruaat huyi thi to, wo abhi tak rukne ka naam hi nahi le rahi thi.

Ye to mai bhi nahi janta tha ki, chhoti maa se ek thappad khana mujhe itna bhari padega ki, uski goonj mujhe subah se lekar raat tak sunayi degi. Aaj mai jitna pita tha, utna to jindagi me kabhi bhi nahi pita tha.

Magar un saari maar se jyada bada jhatka to mujhe meri chhoti bahan dene par utaru thi. Pahle to wo mujhe vaani didi se bachane ke liye aage aayi aur khud unse pit bhi gayi thi.

Lekin uske bad kabhi jhuth na bolne wali meri bahan apni us baat se saaf saaf mukar bhi gayi. Iske bad wo khud hi mujhe vaani didi se pitwane ki vakalat karti bhi najar aayi thi.

Ab iske bad, mujhe priya ke pas kabhi bhi akela na chhodne wali meri bahan ab khud hi vaani didi se mujhe apne sath mumbai le jaane ki baat kah rahi thi. Uski ye baat mujhe bilkul bhi hajam nahi ho rahi thi.

Abhi kuch der pahle ami ke vaani didi ke samne ek behad hi bachkana jhuth bolne ki vajah se mujhe uske dimag ke upar bahut jyada taras aa raha tha aur mujhe ye lag raha tha ki, vaani didi ke samne uska ye jhuth pakda jayega.

Mujhe is baat ka dar bhi sata raha tha ki, vaani didi ke samne uska jhuth pakde jaane se wo kahin vaani didi ki saza ki hakdar na ban jaye aur mera aisa sochna jara bhi galat sabit nahi hua tha.

Kyoki vaani didi ne ami ka ye jhuth fauran hi pakad liya tha. Lekin ami ka ye jhuth pakde jaane ke bad bhi, wo na sirf vaani didi ke gusse se bach gayi thi, balki unse milne wali saza se bhi saaf bach nikli thi.

Ye hi nahi usne apne us jhuth se vaani didi ke gusse ko bhi shant karke dikha diya tha. Mai ami ki is baat se khush to jarur tha. Lekin uske jhuth bolne ki baat ko lekar us se thoda naraj bhi tha.

Maine vaani didi ke jaane ke bad, ami se is baare me baat karne ke baare me bhi socha tha. Lekin ami ne vaani didi ke jaane ke pahle hi, mere bhi unke sath mumbai jaane ki baat kah kar, mere samne ek sawal aur khada kar diya tha.

Mujhe samajh me nahi aa raha tha ki, achanak ami ko ye kya ho gaya hai aur wo mujhe vaani didi ke sath mumbai kyo bhejna chahti hai. Ami ka mujhe akele mumbai jaane dena koi kam chaukane wali baat nahi thi.

Shayad ami ki is baat ne meri tarah baki sabko bhi chauka kar rakh diya tha. Chhoti maa ko bhi shayad ami ki is baat ko sunkar itni hi hairani huyi thi. Isliye ami ki is baat ko sunte hi, un ne ami se puchha.

Chhoti maa boli “tujhe pata bhi hai ki, kal punnu ko humare sath juhi ki shadi me shamil hone jana hai. Fir tu ise vaani ke sath mumbai kyo bhejna chahti hai.”

Chhoti maa ki is baat ke jabab me ami ne badi hi sahajta se kaha.

Ami boli “mummy, juhi didi ki shadi me shamil hone ke liye to hum sabhi ja rahe hai. Yadi bhaiya waha nahi bhi gaye to, chal jayega. Lekin vaani didi to apne kaam se akeli hi mumbai ja rahi hai.”

“Mujhe unka akele jana jara bhi acha nahi lag raha hai. Isliye mai un se bhaiya ko apne sath le jaane ki baat kah rahi hu. Waise bhi hetal didi ki surgery ke liye to bhaiya ko is hafte mumbai jana hi hai.”

“Aise me yadi bhaiya kuch din pahle hi mumbai chale jayege to, is se hetal didi ko bhi khushi hogi aur vaani didi ko bhi bhaiya ka sath mil jayega. Bas isi vajah se mai vaani didi se bhaiya ko apne sath mumbai le jaane ki baat kah rahi hu.”

Ami ki ye baat sunkar, chhoti maa shayad ami se kuch kahne wali thi. Lekin vaani didi ne chhoti maa ko chup rahne ka ishara kiya aur fir ami ko samjhate huye kaha.

Vaani didi boli “ammo, mujhe punnu ko apne sath mumbai le jaane me koi pareshani nahi hai. Lekin punnu ko kal yaha par kuch jaruri kaam niptane hai. Aise me yadi mai chahu bhi to, ise apne sath nahi le ja sakti hu.”

Lekin ami ne vaani didi ki is baat ko sire se nakarte huye kaha.

Ami boli “bhaiya ko yaha par koi bhi jaruri kaam nahi hai aur yadi unhe yaha koi jaruri kaam hai bhi to, wo apna kaam aapke wapas aane ke bad bhi nipta sakte hai. Abhi ke liye to unka aapke sath jana hi sabse jyada jaruri hai.”

Ami kisi bhi halat me apni kahi huyi baat se pichhe hatti najar nahi aa rahi thi aur uske apni ye baat kahne ke andaj me mujhe uske jid par adne ki bhi jhalak najar aa rahi thi.

Waise to mera paala nimi, keerti, priya, nikki aur vaani didi jaise bahut jiddi logon se padta hi rahta tha. Fir bhi mai in sab logon me ami ki jid ko hi sabse jyada khatarank manta tha.

Kyoki ami kabhi koi jid karti hi nahi thi. Jid karke apni baat manwana uski aadat me hi nahi tha. Lekin yadi kabhi kisi baat ko lekar wo jid par ad jaye to, fir use uski jid se digana bahut hi mushkil hota tha.

Abhi bhi ami aisi hi kuch harkat karti najar aa rahi thi. Magar is samay wo apni ye harkat chhoti maa aur vaani didi ke samne dohrane ja rahi thi. Jiska anjam ami ke liye nuksandayak ho sakta tha.

Kyoki ye dono kisi par bhi hath chhodne me jara bhi nahi chukte the. Vaani didi to fir bhi ami ka lihaj kar sakti thi. Lekin chhoti maa se aisa kuch karne ki jara bhi ummid nahi ki ja sakti thi.

Wo ami ko is tarah jid par adte dekh kar, uske upar hath bhi chhod sakti thi. Isliye ami ko jid par adte dekh kar, maine fauran hi vaani didi aur uski baat ke bich me kudte huye, ami se kaha.

Mai bola “betu, vaani didi apne kaam ke silsile me har jagah akeli hi jati hai aur wo mumbai bhi koi pahli baar nahi ja rahi hai. Isliye tu mujhe vaani didi ke sath mumbai jaane ki jid chhod de.”

Lekin ami kabhi koi vevajah ki jid karti hi nahi thi. Isliye mere samjhane par uska apni jid se itni aasani se pichhe hat jaane ka sawal hi paida nahi hota tha. Meri is baat ko sunne ke bad bhi usne fir se apni baat ko dohrate huye kaha.

Ami boli “mujhe kuch nahi sunna hai. Maine kah diya hai ki, aap vaani didi ke sath jaoge to, matlab aap vaani didi ke sath jaoge. Yadi aap vaani didi ke sath nahi jaoge to, fir mai khud vaani didi ke sath jaugi.”

Ami ko is tarah jid karte dekh kar, chhoti maa us par gussa karne lagi. Lekin vaani didi ne unhe shant karwaya aur muskurate huye kaha.

Vaani didi boli “mausi, aap shant rahiye. Punnu ami se baat kar raha hai. Mai bhi apne jaane se pahle thoda inki nautanki dekh lena chahti hu.”

Vaani didi janti thi ki, mai ami ko aasani se samjha sakta hu. Isliye un ne chhoti maa ko shant karwa kar is baat ko hansi me taal diya tha. Lekin mai ami ki aadat ko achi tarah se janta tha.

Wo mujhe pareshan karne wali harkat kabhi nahi karti thi aur yadi abhi wo aisa kuch kar rahi thi to, jahir si baat thi ki, is samay uske man me mujhe ya vaani didi ko lekar jarur koi baat chal rahi thi.

Jis vajah se wo mujhe vaani didi ke sath mumbai bhejne ki jid par adi huyi thi. Ami ki is jid ka karan janne ke liye mai uske samne aakar baith gaya aur fir uska hath apne hathon me lete huye bade pyar se us se puchha.

Mai bola “betu, mujhe sach sach bata kya baat hai. Tujhe kya baat pareshan kar rahi hai, jo tu mujhe vaani didi ke sath mumbai bhejna chahti hai.”

Meri baat sunkar, ami thodi der tak gaur se mera chehra dekhti rahi. Lekin fir achanak hi uski aankhon se jhar jhar aansu bahne lage aur wo aage bad kar, mere gale se lag gayi.

Ami ki is harkat ne sabko hairan karke rakh diya tha. Lekin sath hi sath uski is harkat ne mere is yakin ko bhi pakka kar diya tha ki, is samay use koi baat pareshan kar rahi hai.

Ami ko is tarah rota dekh kar, mai pyar se uske sar par hath ferne laga aur use chup karna laga. Vaani didi bhi samajh chuki thi ki, ami ke is tarah jid karne ke pichhe ka raz kuch aur hi hai.

Is mamle ki gambhirta ko samajhte huye, vaani didi bhi mere pas aakar ghutno ke bal baith gayi. Un ne pyar se ami ke sar par hath fera aur fir uska hath pakad kar use apne samne khada karke, bade hi pyar se us se puchha.

Vaani didi boli “betu, mujhe bata, tujhe kis baat ka dar sata raha hai. Mai hu na. Mere hote huye, tujhe kisi bhi baat se darne ki jarurat nahi hai.”

Vaani didi ki baat sunkar, ami ne fir se apni baat ko dohrate huye kaha.

Ami boli “mai aapko akele mumbai nahi jaane dugi.”

Itna bol kar wo aage bad kar vaani didi ke gale se lag kar rone lagi. Uski ye harkat kuch ajib jarur thi. Lekin uski is harkat se hum sabko samajh me aa gaya tha ki, ami is samay kisi baat se bahut jyada dari huyi hai.

Lekin wo kis baat se dari huyi hai. Ye kisi ke bhi samajh me nahi aa raha tha. Keerti bhi bahut der se ami ki in ajib harkaton ko dekh rahi thi. Lekin use bhi kuch samajh nahi aa raha tha.

Magar ab jaise hi ami ne ek hi baat ki jid pakad li to, keerti ko bhi is baat ka aehsas ho gaya ki, ami ke is tarah se jid karne ke pichhe jarur koi khas vajah chhupi huyi hai.

Lekin is samay ami ke apni jid par ad jaane ki vajah se vaani didi ko apni flight pakadne me der ho rahi hi. Isliye keerti ne ami ko samjhate huye kaha.

Keerti boli “dekh ammo, hum sab ki vajah se pahle hi vaani didi ki ek flight chhut chuki hai aur yadi tu aise hi roti rahi to, teri vajah se vaani didi ki ye dusri flight bhi chhut jayegi.”

“Isliye tu rona band karke apne dil ki baat vaani didi ko bata de. Yadi teri baat sunne ke bad vaani didi ko bhi laga ki, unhe punnu ko apne sath mumbai le jana chahiye to, wo jarur punnu ko apne sath le jayegi.”

Keerti ki baat sunne ke bad, vaani didi ne ami ke aansu ponchhe aur fir keerti ki baat ka samarthan karte huye bade hi pyar se ami se kaha.

Vaani didi boli “betu, keerti sahi kah rahi hai. Mere liye ye flight pakadna bahut jaruri hai. Lekin tu meri sabse bahadur aur samajhdar bahan hai. Mai kabhi teri kisi baat ko halke me nahi leti hu.”

“Magar is samay teri is jid ko pura kar pana mere bas me nahi hai. Kyoki kal yaha par punnu ko kuch jaruri kaam niptane hai. Aise me mai chahu bhi to, ise apne sath nahi le ja sakti hu.”

“Fir bhi tu mujhe bata ki, tujhe aisi kya baat pareshan kar rahi hai, jiski vajah se tu ise mere sath bhejna chahti hai. Mai tujhse vada karti hu ki, mai teri har pareshani ko door karugi.”

Lekin vaani didi ki ye baat sunne ke bad bhi ami ke muh se koi bol nahi fute aur woe k tak vaani didi ko dekhti rah gayi. Ye dekh kar vaani didi ne fir apni baat ko dohrate huye kaha.

Vaani didi boli “betu bata na kya baat hai. Mujhe teri chinta ho rahi hai.”

Vaani didi ka itna kahna tha ki, ek baar fir ami ki aankhon se aansuon ka bandh bah nikla. Lekin is baar shayad vaani didi ko ami ke in bahte aansuon ka matlab samajh me aa chuka tha.

Isliye un ne ek baar fir ami ko chup karaya aur uska chehra apne hathon me tham kar, uski aankhon se aankhen milate huye kaha.

Vaani didi boli “betu, meri taraf dekh. Kahin tujhe is baat ka dar to nahi lag raha hai ki, mumbai jakar mujhe kuch ho jayega.”

Vaani didi ka itna kahna tha ki, ami ki aankhne ek baar fir se chhalak gayi aur usne aage bad kar ek baar fir vaani didi se lipat kar rona suru kar diya. Magar is baar hume uske rone ka matlab samajh me aa chuka tha.

Vaani didi ka sawal sunkar, ami ka un se lipat kar rone lagna to yahi sabit kar raha tha ki, vaani didi ka lagaya gaya andaza bilkul sahi hai. Is baat se parda to uth gaya tha ki, itini der se ami ko kaun si baat pareshan kar rahi thi.

Lekin abhi bhi is baat par parda pada hi hua tha ki, is baat ko lekar ami itni pareshan kyo hai. Pahle mujhe laga ki, shayad ami vaani didi aur nisha bhabhi ko Khalid ko lekar huyi baat chit ki vajah se itna pareshan hai.

Magar fir mujhe yaad aaya ki, vaani didi to nisha bhabhi se ye baat karne ke pahle hi, ami nimi ko unke kamere me bhej chuki thi. Uske bad ami nimi neha ke unke kamre me jaane ke bad hi, uske sath niche aayi thi.

Jis vajah se mujhe ami ke ye baat sun sakne ki ummid kam hi najar aa rahi thi. Fir bhi ye baat to puri tarah se saaf thi ki, aisi hi koi baat is samay ami ko pareshan kar rahi hai.

Lekin vaani didi ne ye baat janne ke liye jara bhi jaldbaji nahi dikhayi. Un ne ami ko is tarah rote huye dekha to, pyar se uske sar par hath ferne lagi. Fir jab ami thoda shant huyi to, use apne samne khada karke, bade hi pyar se kaha.

Vaani didi boli “mujhe nahi pata tha ki, meri ammo mujhe itna jyada pyar karti hai. Lekin kya meri naukri jaane ke bad mausa ji ki tarah tera bhi mere upar se viswas uth gaya hai, jo tu mere mumbai jaane se itna jyada dar rahi hai.”

Vaani didi ki is baat ne ami ke upar teer ki tarah asar kiya. Ami ne fauran hi apne tevar badalte huye, bade hi gusse me vaani didi se kaha.

Ami boli “mujhe aapke upar pura viswas hai aur apni naukri jaane wali baat kah kar mujhe bevkuf banane ki koshish bilkul mat kijiye. Kyoki mai ache se janti hu ki, ab aap kya ho.”

Ami ki is baat ne hum sabko hi nahi, balki vaani didi ko bhi chauka kar rakh diya tha. Hume to kuch samajh me nahi aaya ki, ami kya kahna chahti hai. Lekin shayad vaani didi ko ami ki is baat ka matlab samajh me aa gaya tha.

Vaani didi is samay ami ke samne ghutno ke bal par baithi huyi thi. Lekin ami ki ye baat sunte hi, un ne apne ek pair ko mod kar uske upar ami ko baitha liya aur fir hairani bhare shabdon me us se puchha.

Vaani didi boli “mai samjhi nahi, tu kya kahna chahti hai. Ab mai kya hu.”

Vaani didi ki ye baat sunkar, ami aniruddha ki taraf dekhne lagi. Jise dekh kar vaani didi samajh gayi thi ki, wo aniruddha ke samne apni ye baat kahne se hichak rahi hai. Vaani didi ne ami ki is hichak ko door karte huye kaha.

Vaani didi boli “yadi tu is baare me kuch bhi janti hai to, aniruddha ke samne bhi tu apni wo baat kah sakti hai. Aniruddha mere bahut bharose ka aadmi hai.”

Vaani didi ki ye baat sunkar, ami ne unki is hairani ko door karte huye kaha.

Ami boli “wo aaj sham ko saxena uncle ke ghar par commissioner uncle aaye the. Wo jab aapko phone par IB officer banne ki badhai de rahe the. Tab mai wahi par thi.”

Ami ki is baat ne vaani didi ke sath sath baki sabko bhi hairan karke rakh diiya tha. Ami ki ye baat sunne ke bad hum sab hairani se vaani didi ki taraf dekhne lage. Papa bhi fati fati aankhon se vaani didi ko hi dekhe ja rahe the.

Ami ne vaani didi se jude ek bahut bade raz ke upar se pardafash kiya tha. Mere man me aksar ye sawal aata tha ki, ab to vaani didi CID officer nahi hai. Fir bhi unke pas unka service revolver kyo rahta hai.

Iske alawa vaani didi ka job chale jaane ke bad bhi, ab tak mujhe unke power me kahin koi kami dekhne ko nahi mili thi. Is baat ko lekar mere man me bahut se sawal uthte rahte the.

Magar aaj sham ko hi vaani didi ne pritam ke yahi sawal karne par use jabab dete huye kaha tha ki, CID officer ko unke order follow karne ke liye saxena uncle ne kaha hai.

Us samay pritam ke sath sath mujhe bhi mere man me uth rahe sawalo ka jabab mil gaya tha aur maine bhi vaani didi ki us baat ko sach maan liya tha. Lekin ab ami ne vaani didi ki us baat ko puri tarah se